«Агростартап» кыттааччылара бизнес былааннарын көмүскээтилэр

30.07.2019

Бүгүн тыа хаһаайыстыбатын министиэристибэтин актовай залыгар «Агростартап» программа нөҥүө грант ылааччылар хамыыһыйа иннигэр бизнес бырайыактарын көмүскүү сылдьаллар. Конкурска барыта 67 кытааччы сайаапка биэрбититтэн 57-тэ иккис түһүмэххэ киирбит. Бу икки күн устата фермэрдэр уонна тыа хаһаайыстыбатынан дьарыктаныан баҕарааччыларга тыҥааһыннаах күн. Быйыл «Агростартап» нөҥүө 108 мөлүйүөн солк. көрүллэн турар.

Сунтаар улууһун Кириэстээҕиттэн сылдьар Александр Иванов ынах сүөһү иитиитинэн олохтоохтук, ылсан туран дьарыктаныан баҕарар. кини билигин 5 ыанар ынахтаах. Конкруска хапсар түгэнигэр быйыл 20 ыанар ынаҕы атыылаһар былааннаах. Оттон эһиил 8 ынаҕы. Аны 5 сылынан сүөһүтүн ахсаанын 80 төбөҕө тиэрдэр сыаллаах-соруктаах. Билигин хотон тутта сылдьар. Икки үлэһити ылыахтаах: ыанньыксыт уонна оробуочай.

Күн бүгүн биир ынахтан 1200 киилэ үүтү ыыр. Үүтүн «Хочо» МУП-ка туттарар. Сир-уот боппуруоһа барыта быһаарыллыбыт.

Александр этэринэн, «Кириэстээх» кооператив салайааччыта Владимир Егоров эдэр киһини өйүүр, куруук сүбэ-ама биэрэр. Маны сэргэ Александр урут сопхуоска бостуугунан, ньирэй көрөөччүнэн, ыанньыксытынан үлэлээбит буолан ынах сүөһү иитиитин билэр. Бэйэтин тула бииргэ үөскээбит оҕолорун, табаарыстарын мунньан инникитин хаһаайыстыбатын улаатыннарыан баҕарар.

Мэҥэ Хаҥалас Моорук Суолатыттан сылдьар Марианна Протопопова 1 мөл. 950 тыһыынча суумманы гран быһыытынан көрдүүр. Конкурсу ааһар түгэнигэр МТЗ трактор, сүөһү уонна ынах ыыр ааппарат атыылаһыахтаах. Билигин 9 ыанар ынахтаах, инникитин ынаҕын ахсаанын 25 төбөҕө тиэрдиэхтээх. Биир ынахтан ортотунан 1800 киилэ үүтү ыыллар. Сүөһү аһылыгын кыайдахпытына 2400 киилэ5э  таһаарыахпыт диэн былаанныыр.

Эдэр дьон фермэр буолан үлэлиэн-хамсыан баҕарар эбит.    

Количество показов: 116


 -