Александр Атласов Үөһээ Дьааҥы улууһугар сырытта

22.10.2019
 
Тыа хаһаайыстыбатын миниистирэ Александр Атласов бу күннэргэ Үөһээ Дьааҥы улууһугар сырытта. Манна даҕатан эттэххэ, улууска СӨ Бырабыыталыстыбатын бэрэссэдээтэлин 1-гы солбуйааччыта Алексей Стручков саламталаах өрөспүүбүлүкэ бырабыыталыстыбатын бөлөҕө үлэлээтэ.
Нэһилиэнньэни кытта көрсүһүүгэ миниистир бэйэтинэн кэлбитинэн сибээстээн, тыа хаһаайыстыбатыгар үгүс ыйытык киирдэ. Бары билэрбит курдук, быйыл сайын Үөһээ Дьааҥы улууһугар уот туран уустук балаһыанньа үөскээбитэ. Ол курдук икки ый устата баһаардар умуллубакка, дьон эрэйи көрдө. Кылгас сайын үтүөтүн билбэккэ, дьон баһаары утары охсустулар. Эбиитин кураан сатыылаан, от да оттоммото. Онон хоту дойдуга сүөһүнү, сылгыны иитэн, тыа хаһаайыстыбатын сайыннаран, бултаан-балыктаан аһаан олорор дьон бу кыһын улахан кыһалҕаны көрсөр чинчилээхтэр. 

Хоту дойду дьоно көмө көрдөһөн ытаабакка-соҥообокко, кыһалҕаны төһө кыалларынан бэйэлэрин күүстэринэн быһаара сатыыллар. Ол да буоллар кыһалҕалаах дьон дэлэгээссийэ кыттыылаахтарыгар санааларын этэн, боппуруостарыгар эппиэт ылан тарҕастылар.

Санатан эттэххэ, Үөһээ Дьааҥы былааннаабыт 11 тыһ. туонна отуттан 7 тыһ. туонна оттоммута. Былаан 65% туолбут. Бырабыыталыстыба быһаарыытынан, өрөспүүбүлүкэ бюдждетыттан кыстыгы этэҥҥэ туоруурга 12,5 мөл. солк. үп эбии көрүллүө, итинтэн 10 мөл.солк. эбии от атыылаһыытыгар уонна тиэйиитигэр тиэрдиллиэ. Маныаха 1000 туонна оту улууска Таатта, Томпо оройуоннарыттан таһыахтара. 

Салгыы миниистир тыа хаһаайыстыбатын эбийиэктэрин көрдө. Ол курдук Боруулаах нэһилиэгэр үүт собуотугар сырытта. Үлэһиттэр манна былырыын саҥа оборудование кэлэн үлэ-хамнас этэҥҥэ дииллэр. Манна эбэн эттэххэ, "Баачаан" ХЭТ быйыл Адыаччы, Табалаах уонна Сайдыы нэһилиэктэригэр үс минизавод аҕалбыт.
Салгыы Александр Атласов "Тымныы оройо" ТХПК салайааччыта Екатерина Портнягинаны кытта көрсөн, үлэни-хамнаһы кытта билистэ.

Үөһээ Дьааҥылар миниистир хотоҥҥо сылдьан үлэһиттэри кытта ирэ-хоро кэпсэтэн, пищекомбинатка технологтар үлэлэрин көрөн, сыаналаан барбытын астына бэлиэтииллэр. Оттон Бырабыыталыстыба бэрэссэдээтэлин бастакы солбуйааччыта Алексей Стручков хотон тутуутун, ону тэҥэ "Харысхал" оҕо сынньанар, кымыһынан эмтиир лааҕырын үлэтин сөргүтэр боппуруоһугар үлэлиэххэ наада диэн этиитин олохтоохтор үөрэ иһиттилэр. Мунньах түмүгүнэн 2020 сылга Үөһээ Дьааҥыга хотон тутуутун боппуруоһун өйүүргэ уонна үбүн көрөргө, маны таһынан Туймаада ФАПК нөҥүө ас комбинатын атыылаһан "Тымныы Оройо" ТХПК бас билиитигэр биэрэр боппуруоһу 2019-2020 сылга быһаарарга диэн боротокуолга киллэрдилэр.

 

 

Количество показов: 75


 -