АММАЛАР ӨРӨСПҮҮБҮЛҮКЭТЭЭҔИ ФЕРМЕРДЭР ЫҺЫАХТАРЫГАР ҮҺҮС МИЭСТЭНИ ЫЛЛЫЛАР

10.06.2019

Бэс ыйын 10 күнэ — Арассыыйаҕа фермер күнэ. Чурапчыга ыытыллыбыт өрөспүүбүлүкэ фермердэрин уонна кооперативтарын ыһыаҕар аммалар ситиһиилээхтик кытыннылар.  Бастыҥ үлэлээхтэр сыралаах үлэлэрэ бэлиэтэннэ. 

Быйылгы фермердэр, тыа хаһаайыстыбатын кооперативтарын ыһыаҕа РФ үтүөлээх фермерэ, СӨ тыатын хаһаайыстыбатын үтүөлээх үлэһитэ, Төлөй нэһилиэгин бочуоттаах олохтооҕо Василий Смирников төрөөбүтэ 65 сылыгар ананна. Үтүөкэн үлэһит киһи туһунан кэпсиир кинигэ  “Саха сирин киэн туттар бааһынайдара» диэн саҥа олохтоммут серияҕа таҕыста. Кинигэни Василий Никифоров хомуйан оҥордо.

Эҕэрдэ тылы СӨ тыатын хаһаайыстыбатын миниистирэ Александр Атласов, СӨ ыччат дьыалаларыгар уоонна социальнай коммуникацияларга миниистирэ Степан Саргыдаев, СӨ бааһынай хаһаайыстыбаларын уонна кооперативтарын ассоциациятын президенэ Александр Артемьев,  СӨ Судаарыстыбаннай Мунньаҕын тыа сирин уонна аграрнай бэлиитикэтигэр  бэрэссэдээтэлэ, Ил Түмэн дьокутаата Андрей Находкин эттилэр. Ыһыахха бэлиэтэммит бастыҥ үлэлээх хаһаайыстыбалар ортолоругар аммалар аҕыйаҕа суохтар. Ол курдук Бөтүҥтэн «Чолбон» бааһынай хаһаайыстыба салайааччыта Пелагея Иванова “СӨ тыатын хаһаайыстыбатын туйгуна”, Сэргэ Бэстэн Константин Фомин «Ытык аҕа»  бочуоттаах бэлиэлэринэн, «Амма» ТХПК — тан Виктория Старостина «Килбиэннээх  үлэтин иһин» мэтээлинэн,  Эмистэн Афанасий Бубякин «Урбаан эйгэтин сайыннарыыга туйгунун иһин» мэтээлинэн, «Амма» ТХПК (бэрэссэдээтэл Айсен Черноградскай), Сатаҕайтан Дьоруой Лукин аатынан ТХПК (бэрэссэдээтэл Владимир Онуфриев)  «Россельхозбанк» үс сыллаах босхо өҥөтүн туһанарга сэртипикээтинэн наҕараадаланнылар.

Ыһыахха барыта 12 улуус кытынна. Амма улууһа түһүлгэни киэргэтиигэ, эстафетаҕа үһүс миэстэлэри ылла. «Утумнааччылар» күөн күрэстэригэр Сэргэ Бэстэн Анна Фомина Гран-  При буолла. Ырыаҕа Эмистэн Галина Бубякина иккис, 100 м сүүрүүгэ Амма Наахараттан Эдуард Михайлов иккис, «Супер фермер» күрэхтэһиигэ Сэргэ Бэстэн Михаил Елисеев  анал ааты ыллылар. 60-тан үөһээ саастаахтар ортолоругар сүүрүүгэ улуус бааһынайдарын Ассоциациятын бэрэссэдээтэлэ Александра Цыпандина үһүс бириистээх миэстэни ылан атыттарга холобур буолла.

Ыһыах уопсай түмүгүнэн Мэҥэ Хаҥалас улууһа былырыын ылбыт кубогын эмиэ илдьэ хаалла. Иккис миэстэни чурапчылар, үсүһү аммалар ылан кыайыы кынаттанан кэллилэр.

Ааптар: Алтана Артемьева

Количество показов: 100


 -