“ДЬУЛУРҔАҤҤА” КҮҮС-КӨМӨ, ӨЙӨБҮЛ БУОЛУОХХА, эбэтэр сахалыы спорт туһунан хаһыат наада дуу, суох дуу?
Биир бэйэм республикаҕа национальнай бэчээт күнэ тэриллибититтэн астынабын. Бу күн национальнай бэчээккэ болҕомто ууран, кини кыһалҕатын ханныктык эмэтик быһааран, салгыы сайыннарар сыал-сорук турар.
Бу бэлиэ түгэҥҥэ сөп түбэһиннэрэн, маныаха диэри спорду уонна физическэй култуураны сахалыы тылынан сырдатан кэлбит “Дьулурҕан” хаһыат кыһалҕатыгар тохтуохпун баҕарабын.
Ааспыт сырыыга “Дьулурҕан” хайдах тэриллэн үлэлээн кэлбитин туһунан суруйан турабын. Бу сырыыга ону хатылаабаппын. Ханнык баҕарар омукка кини сүрүн баайа – төрөөбүт тыла-өһө буолар. Тылын сүтэрбит, умнубут омук сыыйа сүтэн, симэлийэн хаалыан сөптөөҕүн эһиэхэ итэҕэтэ сатаабаппын.
“Дьулурҕан” сүүрбэ сыл устата Саха сирин спордун, кини геройдарын, улахан таһымнаах күрэхтэһиилэри, урукку историяны сырдатан кэллэ. Бу күҥҥэ диэри Республика, Правительство, туһааннаах – Спорт уонна Бэчээт министиэристибэлэрин чөл олоҕу, чэгиэн-чэбдик буолууну сайыннарар политикатын ыытыһан кэллибит.
“Дьулурҕан” быйыл сүүрбэһис, үбүлүөйдээх сыла. Ол гынан баран, хомойуох иһин, бу кэрэ-бэлиэ түгэни бэрт бөрүкүтэ суох настарыанньалаах көрсөбүт. Билэргит курдук, “Дьулурҕан” – “Республика бүттүүнэ” хаһыаттан саҕалаан “Саха сирэ”, “Киин куорат” хаһыаттарга түөрт балаһалаах сыһыарыы быһыытынан былырыын күһүҥҥэ диэри бэчээттэнэн тахсыбыта. Аны билигин “Сахабэчээт” тэрилтэ иһинэн үлэлиир. Бастаан утаа, бу тэрилтэ генеральнай дириэктэрин эбээһинэһин толорооччу В.И. Сыромятников өйөбүлүнэн, А4 кээмэйинэн 16-лыы балаһалаах биэс нүөмэр билиһиннэрии бэрээдэгинэн бэчээттэнэн тахсан, атыыга хамаҕатык барбыта. Спорт тиэмэтэ урут да, билигин даҕаны ааҕааччылар киэҥ сэҥээрилэрин ылар.
Хаһыаппыт хара тахсыаҕыттан общественнай корреспонденнары кытта ыкса сибээстээхтик үлэлиир. Улуус улуус аайыттан суруйар ааптардаахпыт. Ол курдук, аҥаардас кэнники сылга спорт бэтэрээннэрэ Роман Егоров, Степан Лыткин, тустуу тренердэрэ Кирилл Павлов, Прокопий Иванов, Дьокуускайтан спорду сэҥээрээччилэр Константин Стручков, Максим Афанасьев, Виталий Слепцов, Роман Степанов, Мария Неймохова, Саха АССР үтүөлээх тренерэ Николай Сафонов-Дьырылы, оҕо спортивнай оскуолатын дириэктэрэ Федот Соловьев, суруналыыстар Геннадий Бечеряков, Семен Жендринскэй (Чурапчы), Уйбаан Уйгуров (Хаҥалас) уо.д.а. араас тиэмэҕэ суруйуулара ааҕааччылар сэҥээриилэрин өрүү ылар.
Онтон кулун тутартан, Саха сиригэр коронавирус тарҕанан, карантин биллэриллиэҕиттэн, “Дьулурҕан” хаһыат быһыытынан бэчээттэнэн тахсыыта тохтуурга күһэллибитэ. Уопсайынан, бу сылларга “Дьулурҕан” үөһэттэн өйөбүлэ суох, аҥаардас биир киһи санаатынан, дьулуурунан, этэргэ дылы, быста-быста салҕанан, дьаалытынан үлэлээн кэллэ. Оттон билигин тыҥааһыннаах уонна быһаарыылаах түгэн үөскээтэ. Быһата, сахалыы спорт туһунан хаһыат наада дуу, суох дуу?
Аныгы үйэ сиэринэн, хас биирдии хаһыат интернеккэ бэйэтэ туспа сайтаах буолуохтаах диэммит, үс сыллааҕыттан http://dzulurgan.ru сайты аһан үлэлэтэбит. Эмиэ аҥаардас бэйэ күүһүнэн, туох да тастан көмөтө суох. Онно күннээҕи сонуну, араас иһитиннэриилэри, интервьюлары, хаартыскалары, видеолары таһааран, тиһигин быспакка спорду таптааччыларга тиэрдэ турабыт. Оттон кумааҕы хаһыат анала атын, туспа. Манна сүрүннээн санаа атастаһыыта, ырытыы, история, кэпсээн, быһата нэдиэлэ устата киһи ууруна сылдьан ааҕыллымтыа матырыйааллара бэчээттэнэллэр. Биһиги ону барытын толору өйдүүбүт.
Билигин хаһыат уруккутун курдук бэчээттэнэн тахса туруон баҕарар киһи элбэх. Маныаха туһааннаах тэрилтэлэр: СР Сибээскэ уонна информационнай технологияҕа министиэристибэтэ (миниистир А.А. Семенов), СР Физическэй култуураҕа уонна спорка министиэристибэтэ (миниистир И.Ю. Григорьев), “Сахабэчээт” тэрилтэ (генеральнай дириэктэр Нь.М. Стручкова) биир тылы булан, республикаҕа сахалыы тылынан тахсар спортивнай хаһыаты ситимин быспакка, салгыы тахсарын тэрийиэхтэрин, күүс-көмө, өйөбүл буолуохтарын баҕарабыт.
Онон, “Дьулурҕан” билигин даҕаны уруккутун курдук үрдүк таһымнаахтык бэчээттэнэн тахсар кыахтаах диэн этэбин. “Дьулурҕаҥҥа” күүс-көмө, өйөбүл уонна итэҕэйии эрэ наада. Билэргит курдук, биһиги республикабыт – спортивнай регион. Төһө даҕаны билигин коронавируһунан сибээстээн күрэхтэһиилэр, тэрээһиннэр тохтоон турдаллар, Саха сиригэр сыллата улахан таһымнаах күрэхтэһиилэр тэриллэллэр. Быйыл саас саҕаламмыт спорт кыһыҥҥы көрүҥнэригэр спартакиада, эһиил Горнайга Манчаары оонньуулара, онтон 2022 сылга Бороҕоҥҥо – Саха сирин норуоттарын спортивнай оонньуулара сүрүн тэрээһиннэринэн буолаллар. Маннык улахан тэрээһиннэри “Дьулурҕан” сүүрбэ сыл устата ситиһиилээхтик сырдатан, суруйан кэллэ.
Бу кэрэ бэлиэ түгэнинэн сибээстээн төрөөбүт тылбытынан бэчээттэнэн тахсар бары хаһыаттар, сурунааллар үлэһиттэрин эҕэрдэлиибин! Саамай сүрүнэ, ылыллыбыт таһымы, кирбиини намтаппакка, салгыы өссө айымньылаахтык үлэлииллэригэр баҕарабын. Ылан көрдөххө, бэчээт үлэһиттэрэ – суруналыыстар саха тылын сайыннарыыга, тарҕатыыга сүҥкэннээхэй үлэни ыыталлара сөптөөхтүк сыаналанарыгар баҕарабын. Аны сарсын, от ыйын 2 күнүгэр бүтүн аан дойду үрдүнэн – Спортивнай суруналыыстар күннэрэ бэлиэтэниэҕэ…
Петр ПАВЛОВ, “Дьулурҕан” хаһыат редактора, Россия Суруналыыстарын сойууһун чилиэнэ, СР Бэчээккэ туйгуна.
