Максим Тихонов кэриэһигэр көҥүл тустуу иккис турнирыгар

28.04.2019

Саха Өрөспүүбүлүкэтин күнүгэр В.П. Керемясов аатынан 3 № тустууга аналлаах оҕо спорт оскуолатын саалатыгар 2003-2005 сыллаах төрүөх уолаттар ортолоругар көҥүл тустуу турнира ССРС спордун маастара Максим Максимович Тихонов кэриэһигэр иккис төгүлүн ыытылынна.

            Бастыҥнар умнуллубат аналлаахтар.

            Нам улууһун Үөдэйиттэн төрүттээх-уустаах Максим Тихонов эт-сиин өттүнэн дэгиттэр этэ. Чахчы, айылҕа хатаҕалаабыт киһитэ этэ. Баһылаабыт механизаторын идэтинэн, колхуоһун, совхуоһун үлэлэригэр күннэри-түүннэри түбүктээх сырыыларын быыһыгар, быыс булан, нэһилиэгин ыһыахтарга кылыйан кыыралдьытара, тустан бурҕатыһара, уус-уран самодеятельностарга үҥкүүлүүрэ, ыллыыра-туойара. Сэргэх, уус-уран тыллаах, киһини чуҥкуппат хаачыстыбалардааҕа.

            Оройуон, өрөспүүбүлүкэ күрэхтэһиилэригэр тустара. Ордук табыллан, армияҕа сулууспалыыр сылларыгар тустубута. Забайкальскай байыаннай уокурукка бастаабыта. РСФСР чемпионатыгар түөрт утарсааччыларын хотуталаан баран, финалга аатырбыт хасаҕайдьыт, биир дойдулааҕа Петр Алексеевтыын тэҥнэһэн баран, хаачыстыбанан  баһыйтаран үрүҥ көмүс мэтээлгэ тиксибитэ. ССРС Сэбилэниилээх Күүстэрин чөмпүйүөнүн үрдүк аатын ылары ситиспитэ.

            Нам маастара Максим Тихонов турнирыгар Горнайтан, Хаҥаластан, Хатастан, Дьокуускай куорат 3 №, 5 № спорт оскуолаларыттан, кадеттар оскуолаларыттан 54 ахсыс, тохсус, онус кылаастарга үөрэнэр уолаттар күөн көрүстүлэр.  Көбүөргэ кэтэһэн-манаһан, толлон турбат бэрт сэргэх хапсыһыылар буоллулар. Турнирга көбүөр хаһаайыттара, 3 № спорт оскуола тустууктара күннээтилэр. 38 кг Владимир Слепцов, 42 кг Амир Батыгов, 46 кг Николай Жирков, 65 кг Саша Ксенофонтов, 65 кг үөһэ Эмомдин Федотов, Олимпийскай эрэ училищеттан Айгылан Афанасьев 52 кг, Роман Николаев 58 кг бастакы миэстэлэри ылаттаатылар.

            2 № оскуолаҕа ахсыс кылааска үөрэнэр Коля Жирков улгумнук кэпсиир:

  • “Пиэрибэй кылаастан тустуунан дьарыктанабын. Аҕам аҕалбыта. Бүгүн күүстээх утарсааччылар түбэстэллэр да, умса тардыталаан, кэннилэригэр тахсан, “кириэскэ» эргитэлээн эҥин, технически кыайталаатым. Албыннаан атахха киирэбин. Быраҕар албаска түбэспэтэхтэрэ. Ринат Габышев түргэн хамсаныылардаах, ол да буоллар атахпар киллэртэрбэтим. Эрэл Леонтьев тутара күүстээх. Захвата. Виктор Лебедвтээҕэр ордук тустуук буолуохпун баҕарабын. Боксанан эмиэ дьарыктанабын, уруһуйдуурбун сөбүлүүбүн. Куорат күрэхтэһиилэригэр миэстэлэһээччибин”.           

Бастыҥ тренеринэн Россия чөмпүйүөнэ Николай Григорьевич Яковлев ааттанна.

            Турнирга биллиилээх бөҕөс Максим Тихонов кэргэнэ Галина Тимофеевна, кыыһа София Максимовна, бырааттара, балтылара кэлэн көхтөөхтүк кытыннылар, бастыҥнарга анал бириистэри туттартаатылар.

            Үтүө аат үйэтитиллэр.

 

Саха Өрөспүүбүлүкэтин физическэй культураҕа уонна спорка Министиэристибэтин пресс-сулууспата

 

 

Количество показов: 122