Тихон Готовцев кэриэһигэр волейболга күрэхтэһии

14.04.2019
 

Муус устар 6-7 күннэригэр Уус-Алдан Баатаҕай нэһилиэгэр Тихон Егорович Готовцев кэриэһигэр сааһырбыт дьон ортолоругар волейболга күрэхтэһии буолла.

11 апреля 2019

Т.Е.Готовцев 1964 сыллаахха Ленинградка Лесгафт аатынан физкультурнай институту бүтэрэн сахалартан бастакы үрдүк үөрэхтээх волейболист аатын ылбыта. Дойдутугар кэлэн, Саха государственнай университетыгар, онтон Республикаҕа старшай тренэринэн үлэлээн волейбол оонньуутун саҥа кэрдиис кэмҥэ таһаарбыта. Бэйэтэ өссө оскуолаҕа үөрэнэ сылдьан Республика сборнай хамаандатыгар киирэн Уһун-илии күрэхтэһиитигэр кыттан турар. Ол хамаандаҕа бииргэ оонньообут киһи кэлин доруобуйа харыстабылын министиринэн үлэлии сылдьыбыт И.И.Местников бочуоттаах ыалдьыт быһыытынан күрэхтэһиигэ сырытта.

Бу күрэхтэһии быйыл 25 төгүлүн ыытылынна. Барыта Уус-Алдан 12 нэһилиэктэринэн ыытыллан дьоҥҥо сэргэҕэ бу бэртээхэй оонньууну киэҥник тарҕатта, пропагандалаата. Ол курдук 2000 сыллаахха ... 12 хамаанда кэлэн күрэс былдьаһан турар. Араас кэмнэргэ Абый, Муома, Сунтаар, Уус-Майа, Бүлүү уонна биллэн турар чугастааҕы улуустар хамаандалара мустан дьоҥҥо-сэргэҕэ оонньоон көрдөрөн тураллар.

Күрэхтэһиилэри үксүн спорт министерствота, Урожай обществота уонна Уус-Алдан улууһун волейболун федерацията тэрийэн ыытааччылар. Манна Иван Иванович Колодезников салайан кэлбит олохтоох улуус федерацията улахан оруоллаах. Волейбол дьону-сэргэни түмэр, Сомоҕолуур сүдү күүстээҕин таба өйдөөн бэйэтэ бу оонньууттан төһө да ыраах буоллар билигин улуус депутаттарын советын председателинэн үлэлиир Колодезников И.И., улууска оҕолортон саҕалаан сөҕүмэр үлэни ыытар. Ол курдук улуус күрэхтэһиитэ нэһилиэктэр нэһилиэнньэтин ахсаанынан икки группаҕа хайдан  ыытыллар буолбута хас да сыл буолла. Маны таһынан сылы хайаан да волейбол фестивалынан түмүктүүллэр. Ол түмүгэр Уус-Алдан оҕолоро Республикаҕа биир күүстээҕинэн биллэллэр. Эр дьонун хамаандата Аны сайын Амма спартакиадатыгар кыттаары бэлэмнэнэ сылдьаллар. Онон Уус-Алдан улууһа волейбол оонньуутун сайыннарыыга Республикаҕа саамай бастыҥнык ылсан үлэлиир федерациялаах диир арааһа сыыһа буолбата буолуо.

Онтон дьэ күрэхтэһиибитигэр киирдэххэ быйылгы турниры Уус-Алдан бэйэтэ тэрийэн ыытта. Мана Т.Е.Готовцев турнира аан бастаан көҕүлээн тэрийбит киһи тастыҥ быраата П.П.Готовцев бэйэтин убаһатын бириис быһыытынан туруоран дьону олус астыннарда.

Ити үтүө бачыымы өйөөн Баатаҕай олохтоохторо Гоголев Архив Егорович, Сивцев Анатолий Иннокентьевич биирдии убаһаны туруордулар. Онтон Тихон Егорович төрөппүт кыыһа Шадрина Розалия Тихоновна оҕолорун бырааттарын илдьэ тиийэн күндү ыалдьыт буоллулар, телевизор бириис туруордулар. Баатаҕай  киин улуустарга улахан күөллэрдээҕинэн биллэр. Ол иһин олохтоохтор кыһыннары муҥхалыыллар. Онон күрэхтэһии кыайыылаахтарыгар уонна призердарыгар ити күн муҥхаламмыт хамсыы сылдьар соболору куулунан эбии бириис быһыытынан туруораннар кыттааччылары соһуттулар.

Манна балаһыанньа быһыытынан сүрүн састаапка 45 саастарыттан үөһэлэргэ барыта 4 хамаанда кэлбит. Бу СахаВа ветераннарын алын кэрдииһэ буолар. Адьас аҕыйах хонуктааҕыта ветераннар 65 саастарыттан үөһэлэргэ күрэхтэһэр кэрдииһи ылан тураллар. Маны таһынан бастакы турнирдар кыттыылаахтара билигин 60 саастарын ааспыт спортсменнар туспа группанан күрэхтэспиттэр.

60 саастарыттан үөһэ саастаахтарга 3 хамаанда оонньообутугар утарсааччыларын иккиэннэрин хотоннор Иван Неустроев капитааннаах Тойон Мүрү хамаандата бастаата. Убаһанан, кууллаах собонон наҕараадаланна. Иккис миэстэ Хатас, үһүс Дьокуускай буоллулар. Онтон эдэр ветераннар күрэхтэһиилэрэ аһары эрэйсиилээхтик баран көрөөччүлэри да кыттааччылары да астыннарда. Манна Виталий Никитин капитаннаах Урожай хамаандата бастаата. Финалга Тойон-Мүрү хамаандатын 2:1 хоттулар. Үһүс миэстэҕэ олохтоох Баатаҕай хамаандата Туймааданы 2:0 хотоннор дьоннорун үөртүлэр.

Саастаахтар ортолоругар саамай бастыҥ оонньооччунан Хатастан Василий Борисов ааттанан анал бирииһи тутта. Онтон эдэрдэргэ бастыҥ оонньооччунан Урожай оонньооччута Артур Костенко ааттанна, бастыҥ быһааччы Тойон-Мүрүттэн Семен Сабарайкин, бастыҥ көмүскээччи Баатаҕайтан Дмитрий Илларионов, бастыҥ туруорааччы Тойон-Мүрүттэн Максим Аммосов, онтон саамай саастаах оонньооччунан Прокопий Готовцев ааттанна. Оннооҕор Республика чемпионатыгар призердар аҥардас мэтээлинэн наҕараадаланар буоллахтарына волейболга Республикаҕа өссө буола илик сыалай үс убаһа бириис, хамсыы сылдьар собо буолан кыттааччылар аһары астыннылар.

Олохтоохтор быһаарыыларынан аны күрэхтэһии СахаВА-бол систематынан эр дьоннор уонна дьахталлар холбоһуктаах хамаандаларынан ыытыллар буолуоҕа. Маны тэҥэ сааһырбыт волейболистар Т.Е.Готовцев республика волейбол сайдыытыгар уһулуччу үтүөлэрин учуоттаан туран Республика чемпионатыгар кини аатын иҥэрэр киһи диэн баҕаларын эттилэр.

Николай Кронников,
күрэхтэһии кылаабынай судьуйата

Количество показов: 130