Уһулуччулаах атах оонньооччу Василий Николаев кинигэтэ сүрэхтэннэ

08.06.2019

Былырыын ахсынньыга спорт министиэристибэтин коллегиятыгар Саха сиринээҕи атах оонньууларын чөмпүйэнээтэ 2019 сылтан Василий Николаев аатынан ыытыллар буолуоҕа диэн быһаарбыттара. Бүгүн, бэс ыйын 7 күнүттэн, Дьокуускайга чөмпүйэнээт саҕаланна.

 

Василий Николаев — биллэр спортсмен, салайааччы

Ол чэрчитинэн «Модун» спорт национальнай көрүҥнэрин киинигэр саха биллэр-көстөр спортсменын, салайааччы Василий Васильевич Николаев аатын үйэтитэр «Жизнь — как полет в прыжке» диэн кинигэ сүрэхтэниитэ буолла. Тэрээһиҥҥэ СӨ спордун миниистирэ Иннокентий Григорьев, Култуура уонна духуобунай сайдыы миниистирэ Юрий Куприянов, Василий Николаев кэргэнэ Люция Николаева, Бүлүү улууһун баһылыга Сергей Винокуров, атах оонньууларын федерациятын бэрэсидьиэнэ Анатолий Добрянцев уо.д.а. кыттыыны ыллылар. Манна спортсмен чугас дьоно, аймахтара, бииргэ үөрэммиттэрэ, үөлээннээхтэрэ, доҕотторо муһуннулар.

Василий Николаев — 20-с үйэ чулуу спортсмена. Кини РСФСР уонна Саха АССР атах оонньууларыгар уонна хотугу многоборьеҕа спорт маастара, 80-с сылларга өрөспүүбүлүкэ, Сибиир зонатын, Уһук Илин хас да төгүллээх чөмпүйүөнэ, IХ уонна Х Саха сирин норуоттарын оонньууларын, Баһылай Манчаары спартакиадатын, II уонна III тыа сирин спортивнай оонньууларын муҥутуур кыайыылааҕа буолар. Василий Васильевич уһуну ыстаныыга өрөспүүбүлүкэ рекордун (7 м 21 см) олохтообута отучча сыл тухары куоһарыллыбатаҕа.

 

Улуу киһи туһунан кинигэни спорду сырдатар суруналыыс Владислав Коротовбэлэмнээн таһаарда. Манна аан тылы Ил Дархан Айсен Николаев суруйан, өрөспүүбүлүкэ салалтата Василий Николаевка сүгүрүйэрин, ытыктыырын бэлиэтээтэ. Кинигэ оҥоруутугар Василий Николаев балтыта Наталья Васильевна,кэргэнэ Люция Григорьевна үлэлэспиттэрин хомуйан оҥорбут Владислав Петровичиһитиннэрдэ.

«Кинигэ тахсыыта суруйар, айар киһиэхэ хаһан баҕар үөрүүлээх кэм буолар. Мин спорт эйгэтигэр үлэлиэхпиттэн кинигэ таһаарыытынан дьарыктанабын, 70-ча кинигэни бэлэмнээн, хомуйан таһаардым. Василий Николаевы биһиги көлүөнэ дьон спортсмен, салайааччы быһыытынан үчүгэйдик билэбит. Кэлин бэйэтин кытта билсибитим, алтыспытым. Кини хаһан да баарын биллэрэ сатаабат этэ, олус сэмэй майгылааҕа. Үтүө киһи туһунан кинигэ бэлэмниир буоллаххына үлэ тэтимнээхтик, чэпчэкитик барар, бу кинигэҕэ оннук үлэлээтибит», — диэн Владислав Коротов санаатын үллэһиннэ.

 

Оттон спорт миниистирэ Иннокентий Григорьев Василий Николаевтыын бииргэ улааппыттар. Онон: «Чөмпүйэнээккэ Василий Васильевич аата иҥэриллибитэ бэлиэ түгэн буолар. Мин бииргэ улааппыт киһим буолан, Василий күүстээх майгылааҕын, кыайыыга дьулуурдааҕын билэбин. Оччолорго Бүлүү улууһугар оҕо спортивнай оскуолата,  билиҥҥи курдук дьарыктанарга усулуобуйалар суохтара, онон доҕорум талаанын өссө сайыннарбата, өссө да улахан рекордары оҥоруо этэ диэн саныыбын. Кини бэйэтин дьаныарынан спортсмен быһыытынан сайдыбыта. Василий спорт хайа баҕар көрүҥэр тириэньэрдиэн сөп этэ, ырытар дьоҕурдааҕа, ол иһин спортсменнарга сүбэ-ама биэрэрэ», — диэн миниистир доҕорун туһунан иһирэхтик ахтан ааста уонна кинигэ тахсарыгар үлэлэспит дьоҥҥо махтал суруктары туттарда. Кини Василий Васильевич моһуоннаах статуэтканы оҥотторон кэргэнигэр Люция Григорьевнаҕабэлэхтээтэ. Маннык статуэткалар кэлин чөмпүйэнээт кыайыылаахтарыгар туттарыллыахтара.

 

Василий Николаев кэргэнэ — Люция Николаева

Василий Николаев спортсмен эрэ быһыытынан буолбакка бастыҥ салайааччы, олоххо көхтөөх көрүүлээх киһи буолан үгүс дьон кинини холорбур оҥостор. Бүгүҥҥү тэрээһиҥҥэ мустубут дьон Василий Николаевы айылҕаттан айдарыылаах ураты киһи буоларын өссө төгүл итэҕэйэн, астынан, дуоһуйан тарҕастылар.

Айтана Аммосова, «Саха сирэ» хаһыат, edersaas.ru саайт.

 

Количество показов: 143